Úndistandaǵy iri qarjy jáne aýyl sharýashylyǵy shtatynda QR Qurmetti konsýldyǵy ashyldy

GANDINAGARS. QazAqparat -  10 jeltoqsanda Úndistanda Gýdjarat shtatyndaǵy Gandınagars qalasynda Qazaqstan Respýblıkasynyń Qurmetti konsýldyǵy ashyldy. Oǵan belgili bıznesmen, «ChandanSteelLimited» kompanııasynyń basqarýshy dırektory Dılıp Chandan jetekshilik etedi, dep habarlaıdy QazAqparattyń menshikti tilshisi.

D.Chandan osy eldegi memlekettik jáne isker toptar arasynda keńinen tanymal. Ol Gýdjarat Saıda-ónerkásip palatasynyń múshesi, «ChandanMinirals PL», «ChandanGemstones PL», «IndicGeoResources PL», «SachGeoResources PL», «KalikundInvestment B.V. Netherlands»  basqarýshy dırektory jáne ózge de belgili qoǵamdyq uıymdarǵa jetekshilik etedi.

Qurmetti konsýldyqtyń saltanatty ashylý rásimine Qazaqstan Respýblıkasynyń Úndistandaǵy Elshisi Bolat Sársenbaev, Gýdjarat shtaty úkimetiniń Bas mınıstri Vıdjaı Rýpanı Saheb, Gýdjarat shtaty Úkimetiniń Qoǵamdyq damý mınıstri Ramanbhaı Patkar, Úndistan parlamentiniń depýtaty Devjı Patel qatysty.

Elshi Bolat Sársenbaev óz sózinde bul sharanyń Qazaqstan Respýblıkasy Táýelsizdiginiń 27 jyldyǵy qarsańynda ótip otyrǵanyn erekshe atap ótti. Ol QR Prezıdenti Nursultan Nazarbaevtyń eldiń qalyptasýy men damýyndaǵy atqarǵan zor róline erekshe toqtaldy.

Sondaı-aq endi qurylyp otyrǵan mekemeniń Qazaqstan men Úndistan arasyndaǵy IT-óndirisi, mashınaqurylysy, týrıstik, kóliktik-logıstıkalyq  ınfraqurylymdar, sondaı-aq aýyl sharýashylyǵy salalaryndaǵy ózara tıimdi yntymaqtastyqtyń damýyna yqpal etetindigin atap ótti.

Qurmetti meıman, Gýdjarat shtaty úkimetiniń Bas mınıstri Vıdjaı Rýpanı Saheb Qurmetti konsýldyqtyń ashylýy eki jaqty ekonomıkalyq baılanysty nyǵaıtýǵa yqpal etetindigine jáne ınvestıtsııalyq tasqyndy ulǵaıtatyndyǵyna senimdi ekendigin jetkizdi.