Úndistandaǵy alapat nóser: 45 adam iz-tússiz joǵaldy
ASTANA. QazAqparat - Úndistannyń soltústigindegi Hımachal-Pradesh shtatynda qalyń qar jaýyp, sońy alapat nóserge ulasqan. Saldarynan sý tasqyny bolyp kem degende 45 adam, sonyń ishinde Rýrkı qalasyndaǵy tehnologııalyq ınstıtýttyń 35 stýdenti iz-tússiz joǵalǵan.
Seısenbi kúni NDTV telearnasy habarlaǵandaı, budan buryn stýdentter Lahýl aýdanyndaǵy taýly jerge saparǵa shyqqan, biraq, dúısenbi kúni shtatta qar aralas nóser jańbyr jaýǵan.
Qazirgi tańda Úndistanda mýssondar maýsymy júrip jatyr. Ol maýsym aıynan qyrkúıektiń sońyna deıin jalǵasady. Bıyl mýssondyq jaýyn-shashyn óte kúshti bolyp otyr. Sonyń saldarynan ońtústik-batystaǵy Keral shtaty zardap shegip, 445 adam ajal qushqan. Al 1,4 mln adam sý tasqynyna baılanysty ýaqytsha úılerin tastaýǵa májbúr boldy.
Foto: AFP
