Úndistandaǵy AES mańynda bombanyń jarylýy saldarynan 6 adam qaza taýyp, úsh adam jaraqattandy
ASTANA. 27 qarasha. QazAqparat - Úndistannyń ońtústiginde salynyp jatqan "Kýdankýlam" (AES) atom elektr stansasy mańynda bombanyń jarylýy saldarynan alty adam qaza taýyp, úsh adam aýyr jaraqat aldy.
Bul týraly RBK aqparattandyrdy.
Polıtsııanyń pikirine qaraǵanda, zardap shekkender qatarynda jarylysty uıymdastyrdy degen kúdikke ilingen bir azamat bar, dep habarlaıdy Associated Press.
Quqyq qorǵaý organdary qyzmetkerleriniń sózine qaraǵanda, bomba kezdeısoq jarylǵan. Saldarynan qasynda turǵan úsh úı qırap qalǵan. Oqıǵa ornyna kelip jetken qutqarý jasaǵy qaza tapqan tórt adamnyń múrdesin taýyp alǵan, taǵy ekeýi aýrýhanada kóz jumǵan.
Qıraǵan ǵımarattardy tekserý barysynda polıtseıler taǵy eki jarylmaǵan bombany jáne jarylǵysh zatty jasaýǵa paıdalanylǵan hımııalyq materıaldardy taýyp aldy.
Qaza tapqandardyń jeke bas málimetteri ázirge anyqtalǵan joq. Sebebi aýyl turǵyndary polıtseıler jasaǵy kelgenshe qamaýǵa alynýdan qorqyp óz úılerin tastap ketip qalǵan.
Jarylys AES -ke tikeleı jaqyn ornalasqan, ıadrolyq energetıkaǵa narazylyq týdyrýshylardyń ortalyǵy bolyp tabylatyn aýylda bolǵan. AES-ke eshqandaı hııany tıgen joq, onyń jumysy shtattyq tártipte jalǵasýda.
