Úndistanda jolaýshylar mingen avtobýs tereń saıǵa qulap, 19 adam qaza tapty
ASTANA. 27 qyrkúıek. QazAqparat - 27 qyrkúıek kúngi tańerteńgi ýaqytta Úndistannyń soltústiginde iri jol apaty oryn aldy. Hımachal-Pradesh shtatynyń Sırmýr óńirinde 20 jolaýshy mingen avtobýs tereń saıǵa qulap, 19 adam mert boldy, dep habarlaıdy RBK.
Times of India habarlaǵandaı, avtobýs 180 m bıiktikten qulaǵan. Qazirgi ýaqytta polıtsııa jol apatynyń sebepterin anyqtaýda. Alǵashqy málimetterge qaraǵanda, qaıǵyly oqıǵaǵa tehnıkalyq aqaý sebep bolǵan.
Qutqarýshylar synyqtardyń astynan 18 adamnyń múrdesin alyp shyqty. Kóptegen múrdeler tanymastaı bolyp búlingen. Apat qurbandarynyń kópshiligi jergilikti turǵyndar. Polıtsııa málimetterine qaraǵanda, olardyń barlyǵy oqıǵa ornynda qaza tapqan, taǵy bir jolaýshy Dadhaý qalasynyń aýrýhanasynda kóz jumdy.
Jol apatynan aman qalǵan jalǵyz er adam aýrýhanaǵa jatqyzyldy, onyń jaǵdaıy aýyr.
Gýbernator jáne shtattyń bas mınıstri qaza tapqandardyń týystaryna kóńil aıtty.
Úndistan joldarynda apat jıi bolyp turady. Apatqa joldar men avtokólikterdiń jaǵdaıynyń nasharlyǵy, sondaı-aq, júrgizýshilerdiń jol qozǵalysy erejelerin júıeli túrde buzýy sebep bolady. Bul el jol apatynan qaza tapqandar sany boıynsha jetekshi orynda.
2013 jyldyń mamyr aıynda dál osy shtatta lyq tolǵan jolaýshylar avtobýsy taý jarynan Beas ózenine qulap ketken. Ol kezde 35 adam qaza taýyp, 14 adam zardap shekken bolatyn. Buryn habarlaǵanymyzdaı, júrgizýshi rýlge ıe bola almaı qalǵan.
Naýryz aıynda da osyǵan uqsas jol apaty oryn aldy. Goadan Mýmbaıge kele jatqan jolaýshylar avtobýsy Úndistannyń batysyndaǵy Maharashtra shtatynda jol apatyna ushyraǵan. Júrgizýshi rýlge ıe bola almaı, avtobýs jol qorshaýyna soǵylyp baryp bıik kópirden keýip qalǵan ózen arnasyna qulaǵan.
Qaıǵyly oqıǵanyń saldarynan 37 adam qaza taýyp, 10 jolaýshy ár túrli jaraqat aldy. Zardap shekkender arasynda shetel azamattary, sonyń ishinde máskeýlik Marııa Kostenevskaıa bolǵan.
