Úndistanda jarylystan 46 áskerı qyzmetshi qaza boldy
ASTANA. QazAqparat - Úndistannnyń Djammý jáne Kashmır shtatynda bolǵan terakt saldarynan ondaǵan adam qaza tapty, dep habarlaıdy «QazAqparat» HAA VVS-ge silteme jasap.
Oqıǵa 14 aqpan kúni Pýlvama okrýginiń mańynda boldy. Jankeshti lańkes 78 kólikten quralǵan áskerı kolonnanyń janynan óte bere 350 kg jarylǵysh zat ornatylǵan mashınany jaryp jibergen.
Sońǵy aqparatqa sáıkes, ajal qushqandar sany 46-ǵa jetti.
Úndistandyq áskerıler Djamma qalasynan Shrınagarǵa bara jatqan. Kolonnada jalpy 2,5 myń áskerı qyzmetshi bolǵan.
Mashına 42 adam mingen avtobýstyń tusynda jarylǵan.
Lańkestik shabýyl úshin jaýapkershilikti Kashmır óńiriniń Pákistanǵa qosylýyn qoldaıtyn «Djaısh-e-Mýhammad» ıslamshyl tobynyń jasaqtary aldy.
Úndistannyń premer-mınıstri Narendra Modı qaza tapqandardyń jaqyndary men týystaryna qaıǵyra kóńil aıtty.
Foto: www.efe.com
