Úndistanda valıýta aıyrbastaýdy 30 dollarǵa shektedi
ASTANA. QazAqparat - Úndistan Úkimeti iri banknottardy aınalymnan shyǵarý týraly sheshimnen keıin valıýta aıyrbastaý erejesin kúsheıtti. Buryn bir adam 4 myń rýpııaǵa deıin almastyrý múmkindigine ıe bolsa, endi 2 myń (30 dollarǵa jýyq) rýpııany bir ret qana aýystyrady, dep habarlaıdy Bı-Bı-Sı.
Ótken aptada Úndistannyń Premer-mınıstri jemqorlyqpen kúres júrgizý aıasynda aınalymnan 500 (7 dollar) jáne 1000 rýpııalyq banknottardy aınalymnan shyǵarý týraly sheshimdi habarlady.
500 jáne 1000 rýpııalar eldegi qolma-qol aqsha aınalymynyń 85%-yn quraıdy. Sarapshylardyń pikirinshe, Úndistandaǵy osyndaı «qara aqsha» naryǵy joǵary. ıAǵnı, zańsyz jolmen nemese salyq qyzmeti organdarynan jasyryn túrde alynǵan aqsha týraly aıtyp tur. Bılik eń kóp paıdalanylatyn qaǵaz aqshany qoldanystan shyǵaryp, naryq shonjarlaryn anyqtamaqshy. Biraq bul bastama tabysy tómen Úndistan turǵyndaryna, sondaı-aq qolma-qol aqshamen jumys jasaýǵa ádettengen bólshek saýdamen aınalysatyn saýdagerlerge aýyr soqqy bolyp tıdi.
Úkimettiń bul sheshimi eldi dúrliktirdi: halyq bankomattardan qolma-qol aqsha sheshýge asyqty. Saıyp kelgende, bılik qolma-qol aqsha sheshýge shekteý qoıdy. Sharýa qojaıyndary men jas jubaılardy qospaǵanda, Úndistan turǵyndaryna kúnine 10 myń jáne aptasyna 24 myń rýpııadan (350 dollar) artyq shyǵarýǵa tosqaýyl qoıyldy. Toıǵa daıyndyq jasap jatqan otbasylarǵa 250 myń rýpııaǵa deıin aqsha sheshýge ruqsat etildi.
