Úndistanda úsh mektep oqýshysy selfı jasaý ústinde kólge batyp ketti
ASTANA. QazAqparat - Úndistannyń ortalyǵyndaǵy Shıngva selosynyń mańyndaǵy kólge 10-synyptyń úsh oqýshysy selfı jasamaq bolǵan kezde batyp ketti. Bul týraly TASS Maharashtra shtatynyń polıtsııasyna silteme jasap habarlady.
Quqyq qorǵaý organdarynyń málimetteri boıynsha, 15-16 jastardaǵy bes bala olardyń biriniń týǵan kúnin atap ótý úshin kóldiń jaǵasyna kelgen. Úsheýi sýdyń jarqabaǵynda selfı jasamaq bolǵan kezde, qulap ketip, sýǵa bata bastady. Qalǵan ekeýi olardy qutqarmaqshy boldy, alaıda olardyń bireýi de júzý bilmeıtin. Olar dostaryna kómektese almady, ózderi áreń aman qaldy, balalardyń aıqaılaǵan daýysyn estigen jergilikti turǵyndar qutqaryp qaldy.
