Úndistanda temirjol kópiri opyrylyp, 26 adam qaza tapty

GÝVAHATI. QazAqparat – Sársenbi kúni Úndistannyń soltústik-shyǵysyndaǵy Mızoram shtatynyń Saırang qalasynda salynyp jatqan temirjol kópiri qulap, kem degende 26 jumysshy qaza tapty. Taǵy 2 adam jaraqat aldy. Memlekettik temirjol basqarmasy tekserý bastady, dep habarlaıdy QazAqparat Reuters agenttigine silteme jasap.

Buqaralyq aqparat quraldary kópir qulaǵan kezde oqıǵa ornynda 40-qa jýyq jumysshy bolǵanyn jazýda, al polıtsııa 28 jumysshy týraly habarlady.

Qazirgi ýaqytta qutqarýshylar 13 adamnyń máıitin tapty. Іzdestirý-qutqarý operatsııasy jalǵasyp jatyr.

Oqıǵa Bhaırbı-Saırang jańa temirjolynyń qurylysy kezinde boldy. Jańa jol Mızoramdy eldiń qalǵan bóligimen jalǵastyryp, týrıster aǵynyn arttyrady, áleýmettik-ekonomıkalyq damýǵa serpin beredi dep kútiledi.

Eldiń premer-mınıstri Narendra Modı zardap shekkenderge jan-jaqty kómek kórsetiletinin málimdedi.

Eske salaıyq, maýsym aıynda Úndistanda sońǵy jıyrma jylda bolmaǵan eń iri temirjol apaty oryn alyp, kem degende 288 adam kóz jumdy.

Al ótken jyldyń qazan aıynda eldiń batysyndaǵy Gýdjarat shtatynda aspaly kópir opyrylyp, 135 adam qaza tapqan bolatyn.