Úndistanda táýligine 400 myńnan asa adam koronavırýs juqtyrady
NUR-SULTAN. QazAqparat – Úndistandaǵy koronavırýspen baılanysty jaǵdaı kúrdeli, el bıliginiń naýryzǵa deıin vaktsınaǵa mán bermegeni anyqtalyp otyr. Bul týraly QazAqparat BBC-ge silteme jasap habarlaıdy.
Djons Hopkıns Ýnıversıtetiniń dereginshe, álem boıynsha pandemııa bastalǵan kezden bastap koronavırýs juqtyrǵandar sany 153 mln-ǵa jetti, qaıtys bolǵandar sany – 3,2 mln. Koronavırýs juqtyrǵandardyń táýliktik kórsetkishi bir aptadan asa rekord jasaýda – táýligine 800 myńnan asa oqıǵa.
Munyń jartysy Úndistanǵa tıesili. Ótken senbide sońǵy derekter boıynsha 402 myńǵa jýyq adam koronavırýs juqtyrǵan. Elde barlyǵy osy ýaqytqa deıin 20 mln adam koronavırýs juqtyryp, 219 myń adam qaıtys bolaǵan. Alaıda sarapshylar bul statıstıkanyń shyndyqqa janaspaıtynyna senimdi. Sebebi esep tek dárigerlerdiń qaraýynda bolǵan naýqastar arasynda júrdi. Myńdaǵan úndistandyq alǵashqy medıtsınalyq kómek almaı qaıtys bolǵan.
Osy oraıda premer-mınıstr Narendra Modıdiń partııasy sheshýshi shtat Batys Bengalııadaǵy saılaýda jeńilis tapty.
Álemdegi iri vaktsına óndirýshi Serum úndi ınstıtýtynyń basshysy Adar Pýnavala Narendra Modıdiń úkimetin óz halqyn vaktsınamen qamtamasyz ete almady dep aıyptady.
Brıtandyq Financial Times-ke bergen suhbatynda Pýnavala ınstıtýtqa naýryzdyń ortasyna deıin el bıliginen iri vaktsına partııasyna eshqandaı tapsyrys túspegenin aıtty.
Onyń sózinshe, ol ýaqytqa deıin tek 21 mln doza vaktsınaǵa ǵana tapsyrys berilgen. Halyqtyń sanymen salystyrǵanda, bul – óte az. Vaktsına tapshylyǵy maýsymnyń ortasyna deıin jalǵasady, deıdi sarapshy. Sol ýaqytqa óndiris kólemin aıyna 100 mln dozaǵa deıin ulǵaıtý josparlanǵan. Sonymen qatar AstraZeneca preparatynyń negizgi kólemin óndiretin Serum ınstıtýty basqa elderge eksportty arttyrýǵa nıetti.
