Úndistanda sý tasqyny aımaǵynan 15 myńǵa jýyq adam evakýatsııalandy
NUR-SULTAN. QazAqparat – Úndistannyń soltústigindegi Djammý men Kashmır odaǵy aýmaǵyndaǵy Amarnath qasıetti úńgir hramy aımaǵynan 15 myńǵa jýyq adam qaýipsiz jerge kóshirildi, dep habarlaıdy QazAqparat TASS aqparat agenttigine siltemem jasap.
NDTV telearnasynyń senbi kúni habarlaýynsha, evakýatsııalaý operatsııasyna jergilikti garnızon men shekara bólimderiniń áskerı qyzmetshileri jumyldyrylǵan.
Juma kúni kúshti mýsson nóserinen týyndaǵan sý tasqyny saldarynan kem degende 15 adam mert boldy. El bıliginiń málimetinshe, taǵy 40-tan astam adam iz-túzsiz joǵaldy.
Juma kúni aǵyn sý men kóshkin shatyrlar men qoǵamdyq ashanalardy basyp, din ustanýshylar jatqan lagerler balshyq pen tasqa toldy. Qazirgi ýaqytta adamdar ýaqytsha ornalastyrý oryndaryna jetkizilýde.
Qutqarý toptary iz-túzsiz joǵalǵandardy izdep jatyr.
Úndistanda halqynyń kópshiligin musylmandar quraıtyn jalǵyz aımaq - Djammý men Kashmırde 30 maýsymnan bastap, COVID-19 pandemııasyna baılanysty eki jyldyq úzilisten keıin amarnath-ıatra qajylyǵy ótip jatyr.
Myńdaǵan adam Djammý qalasynan Amarnathtyń qasıetti taý úńgirine deıingi saıahatyn bastaıdy.
Dástúr boıynsha, úńgir jylyna tórt aıdyń shamasynda ǵana jurtshylyq úshin ashyq, al qajylyq ýaqyty 40-45 kúnmen shektelgen kezde qasıetti orynǵa jaıaý ǵana barý kerek.
Foto: AP Photo/Anupam Nath
