Úndistanda sektanttar tasattyqqa er adamdy shalǵan
ASTANA. QazAqparat - Úndistanda sektanttar toby jaýyn-shashyn jaýyp, egin bitik óssin degen nıetpen 55 jastaǵy er adamdy qurbandyqqa shalǵan.
Thepa Kharıa esimdi er adamnyń basy kesilgen denesi eldiń shyǵysynda ornalasqan Djarkhand shtatyndaǵy úıinen tabylǵan. Polıtsııanyń málimetine qaraǵanda, ony 31 mamyr kúni óltirgen. Al týystary bolsa ony "orka" nemese "mýdkatva" sektalarynyń ókilderi jasady dep otyr. Osy sektadaǵylardyń nanym-senimderi boıynsha egistikke adamnyń basyn kómse, sol jyly jaýyn-shashyn bolyp, astyq mol túsedi-mys.
Sheteldik BAQ-tyń jazýynsha, er adam jalǵyz turǵan. Tańerteń ol ádettegideı bazarǵa kelmegendikten, kórshileri alańdaı bastaıdy. Er adamnyń úıine kelgen olar edende bassyz jatqan deneni kórgen. Endi polıtsııa oqıǵany tergeýge kiristi.
Úndistanda bundaı oqıǵalar jyl saıyn kezdesip turady. 2012 jyly Lohardag qalasynyń turǵyny qurbandyqqa óz áıelin shalǵan bolatyn, al 2013 jyly Gýmla okrýgynyń turǵyndary sektanttardan basy kesilgeli jatqan qyzdy qutqaryp qalǵan edi. Aldyn ala málimet boıynsha, sektanttar eki apta boıy Úndistanda qaıtpaı turǵan aptap ystyqqa baılanysty bul tasattyqty jasaýy múmkin dep boljanyp otyr. Esterińizge sala keteıik, Úndistandaǵy ystyqtan 2 myńnan astam adam kóz jumdy.
