Úndistanda poıyzdardyń soǵysý sebebi aıtyldy

ASTANA. QazAqparat – Úndistandaǵy poıyzdardyń soǵysýyna elektrondy dabyl júıesindegi qatelik sebep boldy. Sonyń saldarynan poıyz joldy durys aýystyrmaǵan, dep habarlaıdy QazAqparat tilshisi.

Euronews agenttiginiń málimetinshe, mundaı derekti Úndistannyń temirjol kóligi mınıstri málim etken. Al el Premer-Mınıstri kináliler jazaǵa tartylatyndyǵyna ýáde berip otyr. Qazirgi ýaqytta tergeý poıyz apatyna kinálilerdi anyqtap jatyr.

Qaıǵyly oqıǵa juma kúni eldiń shyǵysyndaǵy Odısha shtatynda, Balasor qalasy aýdanynda bolǵan. Naqtylanǵan derekterge sáıkes, 3 poıyzdyń soǵysýy saldarynan 300-den astam adam mert bolǵan. Degenmen, el bıligi qaza tapqandardyń sany artýy múmkin ekendigin de joqqa shyǵarmaıdy. Munan bólek, júzdegen jolaýshy jaraqat alǵan.

2 maýsym kúni bolǵan apat Úndistan tarıhyndaǵy adam shyǵyny boıynsha úshinshi temirjol apaty sanalady. 1981 jyldyń 6 maýsymynda Bıhar shtatynda jolaýshylar poıyzy ózengen qulaǵan edi. Sonyń saldarynan keminde 750 adam mert bolǵan. Al 1995 jyldyń 20 tamyzynda Ýttar-Pradesh shtatynda «Pýrýshottama ekspresi» jolda turǵan jolaýshylar poıyzyna soǵylyp, 350-den astam adam qaza tapqan bolatyn.

Osyǵan deıin Úndistanda birneshe poıyz soqtyǵysyp, 288 adam qaza tapqanyn jazǵan bolatynbyz.