Úndistanda musylmandar men ındýıster arasyndaǵy janjal ýshyǵyp barady
ASTANA. 9 qyrkúıek. QazAqparat - Úndistannyń Ýttar-Pradesh shtatynda musylmandar men ındýıster arasyndaǵy janjal ýshyǵyp barady. Búginde jergilikti bılik áskerılerdiń kómegine júginýge májbúr bolyp otyr.
Álemdik buqaralyq aqparat quraldary habarlaǵandaı, tamyzdyń aıaǵynda bastalǵan teketirester kezinde 15 adam qaza taýyp, taǵy 50 adam jaraqat aldy. Ótken senbi kúni ındýıster men musylmandar arasynda taǵy da qaqtyǵystar boldy. Osydan keıin jergilikti bılik áskerılerdiń kómegine júginip, myńdaǵan sarbaz eldiń soltústiginde ornalasqan Ýttar-Pradesh shtatyna attandy. Qazir polıtsııa 300-ge jýyq adamdy qamaýǵa aldy. Olar dinı alaýyzdyqty ýshyqtyrǵany úshin aıyptalyp otyr. Shtattyń úsh aýdanynda komendanttyq rejım engizildi.
