Úndistanda munaı qoımasynda bolǵan órt kezinde bes adam qaza bolyp, 150 adam jaralandy
ASTANA. Qazannyń 30-y. QazAqparat - Úndistannyń batysyndaǵy Radjastan okrýginde munaı qoımasy órtenip jatyr.
Oqıǵa saldarynan eń az degende, 5 adam qaza bolyp, 150 adam jaralandy, 6 adam iz-túzsiz joǵalǵandar sanatynda, dep habarlaıdy QazAqparat «RIA «Novostı» agenttigine silteme jasap.
Kýágerlerdiń aıtýynsha, aspanǵa kóterilgen jalyn 25 shaqyrym qashyqtyqtan kórinýde, tóńirektiń barlyǵy qara tútin. Úndi armııasynyń jaýyngerleri órt sóndirýshilermen birge órtti aýyzdyqtaýǵa tyrysyp jatyr, jalyndy sóndirýge 25 órt brıgadasy jumyldyrylyp otyr.
«Órt aýmaǵynda qalǵan alty adamdy izdeýge kómektesý úshin áskerıler órt sóndirýshilerge qosyldy. Jalyn óte kúshti jáne ony aýyzdyqtaý qıynǵa túsip otyr», dep málim etti Assoshıeıted Press agenttigine jergilikti polıtsııanyń ókili B.L. Sonı (B.L. Soni).
Onyń aıtýynsha, órtten qaza tapqan bes adamnyń denesi alyp shyǵaryldy, eń az degende, 150 adam túrli jaraqattarmen jaqyn mańdaǵy aýrýhanalarǵa jóneltildi. Qoımaǵa jaqyn mańda turatyn úılerdiń turǵyndarynyń bári jedel kóshirildi, al apat ornyna jaqyn jerdegi elektr stansasy qaýipsizdik maqsatynda jeliden ajyratyldy.
Qazir oqıǵa ornynda izdeý-qutqarý jumystary jalǵasýda.
