Úndistanda mıllıondaǵan bala qoqys jınap, aqsha tabýda
ASTANA. QazAqparat - Búgin - Dúnıejúzilik balalar eńbegin paıdalanýǵa qarsy kúres kúni. Qazir álemde 5 jáne 17 jas aralyǵyndaǵy 246 mıllıonǵa jýyq jetkinshek mektepke barýdyń ornyna, eresekter sııaqty jumys isteýge májbúr. Bul - AQSh sekildi alyp memlekettiń halqyna jetetin adam sany, dep habarlady www.24.kz.
Onyń ústine osy tizimdegi segiz balanyń bireýi adam ómirine qaýipti ári densaýlyqqa zııan jumystardy atqarady. Bir ǵana Úndistannyń ózinde mıllıondaǵan jas urpaqtyń balalyq shaǵy shyjyǵan kúnniń astynda aýyr eńbekpen ótýde. Úndi astanasy Nıý-Delı mańyndaǵy qoqys tastalatyn aýmaqta mıllıondaǵan bala eski-qusqy zattardy jınaıdy. Balalyq shaǵyn osyndaı azapty eńbekpen ótkerip jatqan jetkinshekterdiń biri - Paarvatı. Onyń jasy bar bolǵany 10-da. Bir otbasynyń jelkildep ósip kele jatqan qyzy qala mańynda ústi-basy sasyp, aıaq-qoly tilinip, tańǵy 5-te turyp, qas qaraıǵansha qoqys terip júr. Qarshadaı qyzdyń budan basqa amaly joq. Nanyn áreń taýyp otyrǵan otbasyna balanyń bilimi emes, aqsha tapqany tıimdi.
«Mektepke barǵym keledi. Qoqys tasyǵannan qoldarym aýyrady. Ári bári sasyq. Biraq ata-anam kómekke zárý», - deıdi qoqys jınaıtyn Paarvatı Saso
Sońǵy júrgizilgen sanaq boıynsha, qazir Úndistanda 5 pen 14 jas aralyǵyndaǵy býyny qatpaǵan 4,5 mıllıon bala kúnkóris qamy úshin jumysqa jegilip júr.
«Bizdiń eldegi jetkinshekterdiń balalyq shaǵy aýyr jaǵdaıda ótýde. Biz búgingi jas býynǵa qajetti bilimdi bere almasaq, erteń olar zardap shegetin bolady. Munyń ekonomıkamyzǵa tıgizer zalaly zor bolmaq», - deıdi Balalar quqyqtary boıynsha zertteý ortalyǵynyń dırektory Komal Ganotra.
Ótken aıda Úndistan úkimeti 14 jasqa deıingi balalardyń jumys isteýine tyıym salatyn zań jobasyn usyndy. Qazir bul qujat parlament qaraýynda jatyr. Joba biraýyzdan maquldansa, balalar eńbegin paıdalanǵan jumys berýshilerge 300 den 800 AQSh dollaryna deıingi kólemde aıyppul salynady. Tipti zańǵa baǵynbaǵandardy 6 aıdan 2 jylǵa deıin bas bostandyǵynan aıyrý jazasy berilýi múmkin.
