Úndistanda laı kóshkini saldarynan 73 adam qaza tapty
NUR-SULTAN. QazAqparat - Úndistannyń Ýttar-Pradesh shtatynda sońǵy 4 kúnde tolassyz jaýǵan jaýynnan laı kóshkini jıilep, 73 adam qaza tapty, dep habarlaıdy Habar24.
Kóptegen eldi mekendi sý basqan. Tas jáne temir joldar búlinip, aımaqpen qatynas úzilgen. Tabıǵat apatyna baılanysty aımaqta barlyq mektepter jabylǵan. Ýttarakhand, Radjastan jáne Bıhar shtatynda da osyndaı jaǵdaı tirkelgen. Qazir apat aımaqtarynda izdestirý-qutqarý jumystary júrip jatyr. Myńdaǵan turǵyn qaýipsiz jerge kóshirildi.
Aıta keteıik, Úndistanda maýsym aıynan beri tolassyz jaýyn jalǵasyp keledi. Osy ýaqyt aralyǵynda júzdegen turǵyn kóz jumyp, myńdaǵan adam baspanasynan aıyrylǵan.
