Úndistanda laı kóshkini men tasqynnan 28 adam qaza tapty
ASTANA. QazAqparat - Úndistannyń soltústik-shyǵysynda laı kóshkini men tasqyn saldarynan 28 adam qaza tapty, dep jazady 24.kz.
Eki kún boıy tolassyz jaýǵan nóser sońy selge ulasty. On tórt kisiniń ólimi Assam shtatynda tirkeldi. Bul aımaqta 90 aýyldy sý shaıyp ketken.
Júz elý myńnan astam turǵynǵa úılerin tastap, bıik jerlerge kóshý týraly usynys aıtyldy. Qazir jergilikti bılik ókilderi baspanasynan aıyrylǵan myńdaǵan adamǵa ýaqytsha shatyrlar quryp jatyr.
Budan basqa, tabıǵı apatqa baılanysty mektepter men joǵary oqý oryndaryndaǵy sabaqtar keıinge shegerildi. Jaýyn-shashyn birneshe saǵat buryn basylǵan, biraq aýa raıyn boljaýshylar aldaǵy kúnderi nóser qaıta jaýýy múmkin dep otyr.
