Úndistanda qudyqqa qulap ketken balany 3 kúnnen beri qutqara almaı jatyr
NUR-SULTAN. QazAqparat - Úndistanda qudyqqa qulap ketken balany úsh kúnnen beri qutqara almaı jatyr, dep habarlaıdy QazAqparat VVS-ge silteme jasap.
Úndistannyń ońtústigindegi Tamıl Nadý shtatynda kóshede kórshileriniń balalarymen oınap júrgen Sýdjıt Ýılson esimdi 2 jasar bala abaısyzda tereńdigi 180 metr keletin qudyqqa qulap ketken.Ol qudyqtyń túbine jetpeı, on metrdeı jerde ilinip qalǵan.
Ensiz qudyqqa eresek adam túse almaıdy. Sondyqtan úsh kúnnen beri ony shyǵara almaı álek.
Qutqarýshylar qudyqtyń ishine aýa aıdap jatyr, biraq onyń balaǵa jetip jatqanyna eshkim kepildik bere almaıdy. Qutqarýshylardyń ekinshi toby bala otyrǵan qudyqtyń janynan ekinshisin qazýda.
Jergilikti gazetterdiń jazýynsha, balany sheshesiniń ózi qutqaryp alýdyń amalyn qarastyrǵan. Esi shyqqan ana aldymen qapshyq tigip, balasyn «aýlap» almaqshy bolǵan, artynsha ózi qudyqqa túspekke árekettenedi. Biraq onysynan esh nátıje shyqpaǵan.
