Úndistanda qos mýtatsııasy bar koronavırýs anyqtaldy
NUR-SULTAN. QazAqparat – Úndistan bıligi el turǵyndarynan alynǵan analızderden buryn kezdespegen qos mýtatsııasy bar koronavırýs anyqtalǵanyn málimdedi, dep habarlaıdy QazAqparat VVS aqparattyq agenttigine silteme jasap.
Qazirgi kezde sarapshylar bul shtamnyń qanshalyqty juqpaly ekenin jáne onyń vaktsınalarǵa tózimdiliginiń deńgeıin tekserý ústinde. 18 shtatta alynǵan 11 myńǵa jýyq analızdiń ishinen mamandar 771-iniń ǵylymǵa burynnan belgili vırýsty anyqtady. 736 analız nusqasynan brıtandyq vırýs, 34-inen – ońtústikafrıkalyq vırýs jáne bir brazılııalyq vırýs anyqtalǵan.
Bul rette, mamandardyń aıtýynsha, kóptegen shtamdardyń bar bolýy aýrýǵa shaldyǵýdyń órshýimen tikeleı baılanysty emes.
Sársenbi kúni Úndistanda koronavırýs juqtyrýdyń 47 262 jańa oqıǵasy men 275 ólim jaǵdaıy tirkelgen – bul bıylǵy jylda tirkelgen eń joǵary kórsetkish.
Quramyna eldiń Densaýlyq saqtaý mınıstrliginiń bastamasymen 10 jetekshi ulttyq zerthana kirip otyrǵan Úndistannyń SARS-CoV-2 genomıkasy jónindegi konsortsıýmy (INSACOG) vırýstyń sońǵy úlgilerin gendik jaǵynan zerttedi.
Nátıjesinde batystaǵy Maharashtra shtatynan jınalǵan úlgilerdiń bolmashy bóliginen ótken jyldyń jeltoqsan aıymen salystyrǵanda E484Q jáne L452R mýtatsııalarynyń úlesi baıqalyp otyrǵany anyqtalǵan.
Vırýstar mýtatsııaǵa jıi ushyrap otyrady, alaıda olar ýyttylyqtyń artýy nemese aýrýdyń asqynýyna ákelmeıdi. Olaı bolǵanymen, keıbir mýtatsııalar, mysaly, brıtandyq nemese ońtústikafrıkalyq mýtatsııalary vırýsty budan da juqpaly, tipti ólimge ákeletindeı ete alady.
