Úndistanda koronavırýstan úreılengen sheteldik týrıster bir aıǵa jýyq ýaqyt úńgirde tyǵylǵan
RIShIKESh. QazAqparat – Koronavırýstyń taralý qaýpinen engizilgen karantın rejıminde turatyn adamdar qoldan kelgenshe úırenip jatsa, sheteldik alty týrıst indetten Úndistandaǵy úńgirde jasyrynǵan.
Polıtsııa qyzmetkeriniń aıtýynsha, bir top týrıst Úndistannyń soltústiginde ornalasqan Ýttarakhand shtatyndaǵy Rıshıkesh qalasy mańyndaǵy úńgirde bir aıǵa jýyq ýaqyt turǵan. Polıtsııa týrısterdi jeksenbi kúni anyqtaǵan. Olardyń arasynda Frantsııa, Túrkııa, Ýkraına, AQSh jáne Nepaldan jınalǵan tórt er adam men eki áıel bar. Eldegi erejeler boıynsha, olardyń barlyǵy karantınge jatqyzyldy, dep habarlaıdy QazAqparat CNN -ge silteme jasap.
«Aqshasy bitken týrıster qonaqúıden ketip, úńgirden pana tapqan», - dedi Ýttarakhand polıtsııasynyń ókili Mýkesh Chand.
Olar úńgirde 24 naýryzdan beri turyp jatqan.
Úndistan premer-mınıstri Narendra Modı 25 naýryzdan bastap 14 sáýirge deıin elde qatań oqshaýlaý rejımin engizdi. Keıin el bıligi karantındi keminde 3 mamyrǵa deıin uzartqan. 20 naýryzdan bastap týrısterge Ýttarakhand shtatyna kirýge tyıym salynǵan.
El bıligi karantın sebebimen elde qalyp qoıǵan sheteldik azamattarǵa kómektesý úshin «Úndistanda qalyp qoıǵan» veb-saıtyn ashty.
Djon Hopkıns ýnıversıtetiniń málimetinshe, Úndistanda koronavırýs juqtyrýdyń 17 615 oqıǵasy tirkelgen, 559 adam qaıtys boldy.
Rıshıkesh – ıoganyń álemdik astanasy retinde tanymal qala.
