Úndistanda qaıyqqa naızaǵaı túsip, 7 adam qaza tapty
ASTANA. QazAqparat - Úndilik Bekı ózeninde qaıyqqa jaı túsip, jeti adam qaza tapty. Onyń úsheýi bala. Oqıǵa senbi kúni, 15 tamyzda, Assam shtatynda oryn aldy, dep habarlady Lenta.ru The New Indian Express-ke silteme jasap.
Qaıyqta bolǵan taǵy 21 adamdy túrli dárejede kúıik shaldy.
Japa shekkenderdiń barlyǵy Barpeta (Barpeta) qalasynyń aýrýhanasyna jetkizildi. Úsheýiniń jaǵdaıy aýyr.
Úndistanda maýsym aıynan qazan aıyna deıin jaýyn maýsymy bolady. Bul kezde naızaǵaı da jıi soǵady. Máselen, Bıhar shtatynda jaı túsý saldarynan bir kúnde toǵyz adam qaza tapty.
Áleýmettik qyzmetkerlerdiń baǵalaýynsha, álemde jyl saıyn naızaǵaı saldarynan ortasha alǵanda 24 myń adam ajal qushady, sonymen qatar 240 myńǵa jýyǵy túrli jaraqat alady.
