Úndistanda fabrıkada órt shyǵyp, 43 adam mert boldy
DELI. QazAqparat – Jeksenbi kúni Úndistan astanasy Delıdiń soltústigindegi Anadj Mandı aýdanynda fabrıka órtenip, 43 adam mert boldy, dep habarlaıdy QazAqparat.
Polıtsııanyń málimetinshe, jaraqat alǵan jáne kúıik shalǵandardyń sany 50-den asady.
Oqıǵa ornyna órt sóndirý jáne qutqarý qyzmetteriniń 30-dan astam mashınasy jumyldyryldy.
India Today TV habarlaýynsha, órt sóndirýshilerge operatsııa bastalar aldynda tilsiz jaýdyń tuzaǵynda qalyp qoıǵan adamdar týraly aıtylmaǵan. Bul, adamdardy qutqarý jumysynyń keshýildeýine sebep bolyp, qurbandar sany artqan.
Polıtsııa órt shyqqan kezde fabrıkada 59 adamnyń bolǵanyn málimdedi. Jalyn turǵyn aımaqta ornalasqan tórt qabatty ǵımarattyń ekinshi qabatynda tutanǵan.
Apat ornyna jınalǵan adamdar kóp boldy, olardyń basym bóligi qaza tapqandar men jaraqat alǵandardyń týystary.
Úndistan premer-mınıstri Narendra Modı fabrıkadaǵy oqıǵany «jan túrshigerlik órt» dep atady.
«Jaqyndaryn joǵaltqandardyń qaıǵysyna ortaqpyn. Zardap shekkenderdiń tezirek saýyǵyp ketýin tileımin. Bılik oqıǵa ornynda múmkin bolǵan barlyq kómekti kórsetip jatyr», - dep habarlady ol.
Polıtsııa kásiporynnyń ıesine izdeý saldy.
Jergilikti organdar atalǵan fakti boıynsha tekserýdi bastady. Aıta keteıik, bul apat Úndistan astanasynda bolǵan eń úlken jáne jan túrshigerlik órtterdiń biri.
Avtor: Raýshan Qońyrbaeva
