Úndistanda eń arzan mashınadan eń qymbat kólik jasap shyǵardy
ASTANA. 24 qyrkúıek. QazAqparat - Álemdegi eń arzan mashına - úndistandyq Nano-ny Tata kompanııasynyń kólik óndirýshileri altynmen aptap, kúmispen qaptap shyǵardy.
Nátıjesinde negizgi baǵasy 2,5 myń dollarǵa baǵalanatyn modeldiń quny endi 4 mln. 680 myń AQSh dollaryna jetip otyr, dep jazady InterNovostı.
Habarlanǵandaı, álemdegi eń qymbat kólik 80 keli 22 karattyq altynmen, 15 keli kúmispen qaptalyp, 10 myń baǵaly jáne jartylaı baǵaly tastarmen kómkerilgen.
Esterińizge sala keteıik, osydan úsh jyl buryn ǵana Úndistannyń «halyq avtomobıli» retinde shyqqan Nano bastapqyda orta deńgeıli úndistandyqtarǵa arnalǵan bolatyn. Shyǵarylymnyń alǵashqy kezeńinde kezekke turǵandardyń sany 100 myń adamǵa jetti. Alaıda aǵymdaǵy jyldyń tamyz aıynda The Financial Times gazetiniń málimetteri boıynsha, kompanııa 1202 avtokólikti jasap shyǵardy, ol jospardaǵydan segiz ese kem.
Bul sátsizdikterge asa arzan az lıtrli kóliktiń qaýipsizdik kepildigi sebep bolyp otyr. Birneshe avtomobıl jol ortasynda órtenip, bul jaǵdaı úndistandyq baspasózde qalyń buqaraǵa tez tarap ketti. Budan bólek, sarapshylar qalyptasqan jaǵdaıǵa kompanııanyń osal marketıngtik qyzmeti men úndistandyq avtomobıl naryǵyndaǵy retsizdik kináli degendi alǵa tartýda.
