Úndistanda ekstremısterdiń shabýyly nátıjesinde 70 soldat qazaǵa ushyrady
ASTANA. Sáýirdiń 6-sy. QazAqparat - Úndistannyń Chhattısgarh shtatynda ekstremısterdiń shabýyly nátıjesinde 70 áskerı qyzmetshi qaza boldy.
Jergilikti polıtsııanyń málimeti boıynsha, 300-ge tarta ekstremıst 73 adamnan turatyn áskerılerge torýyl qurdy, dep habarlady RBK agenttigi.
Áskerı qyzmetshiler minip kele jatqan mashına mınaǵa tap bolyp, jaryldy, budan keıin ekstremıster oq jaýdyrdy. Úndistandyq NDTV tele arnasynyń aqparatyna qaraǵanda, polıtsııa 70 adamnyń ajal qushqanyn qýattady.
Solshyl búlikshi-maoıster ondaǵan jyldar boıy Úndistannyń kóptegen shtattarynda qozǵalystyń negizi qalanǵan 1967 jyldan beri zııankestik áreketpen aınalysyp keledi. Ártúrli málimetter boıynsha, olardyń quramynda 10 myńnan 20 myńǵa deıin sodyrlar bar.
