Úndistanda dárigerler naýqastyń asqazanynan 600 shege aldy
ASTANA. QazAqparat - Úndistandyq hırýrgter psıhıkalyq aýytqýy bar naýqastyń asqazanynan 600-den astam shege aldy, ota sátti bolýy úshin magnıt qoldanylǵan, dep habarlaıdy NDTV.
Jýrnalısterge suhbat bergen hırýrg Sıddhartha Bısvastyń aıtýynsha, naýqastyń asqazany 2 santımetrlik shegelerge toly bolǵan. Shegelerdi alý úshin magnıtti qoldanǵan. Ota bir táýlikke sozylǵan.
«Onyń psıhıkalyq aýytqýy bolǵandyqtan, ne jep, ne qoıǵanyn bilmeıdi. Eshqaısymyz da onyń asqazanynan munshalyqty kóp shege shyǵady degen oıǵa kelgen joqpyz», - deıdi naýqastyń týysy.
Bir aı buryn ishi qatty aýyrǵan naýqas aýrýhanaǵa jetkizilip, ýltradybystyq dıagnostıka jasalady. Sol kezde onyń asqazanynda qatty zattar bar ekeni anyqtaldy. Sodan keıin dárigerler kúrdeli otaǵa daıyndyqty bastady.
BAQ-taǵy habarlarǵa súıensek, ota sátti ótken, qazir naýqastyń jaǵdaıy turaqty.
