Úndistanda bir adam jańa tıpti koronavırýsty juqtyrdy
NЬıÝ-DELI. QazAqparat – Úndistannyń Kerala shtaty Trıssýr okrýginde jańa tıpti koronavırýs juqtyrǵan bir adam tirkeldi. Vırýs taıaýda Qytaıdyń Ýhan qalasynan kelgen úndistandyq stýdentten tabyldy. Ol Ýhan ýnıversıtetinde oqıdy. Zertteý nátıjesi jańa koronavırýsqa oń nátıje bergen. Naýqas stýdenttiń jaǵdaıy turaqty, ol oqshaýlanǵan jerde tolyqtaı baqylaýǵa alyndy, dep habarlaıdy India Today.
Kerala densaýlyq saqtaý mınıstri K.K. Shaılaıanyń aıtýynsha, 20 synama zertteýge jiberilgen, sonyń biri jańa koronavırýs juqqanyn rastaǵan.
«Naýqas Qytaıdan kelgen, qazir Trıssýr okrýgindegi aýrýhanada jatyr. Jaǵdaıy turaqty», - dep habarlady mınıstr.
«Biz barlyq aýrýhanalarǵa, sonyń ishinde jeke aýrýhanalarǵa da osyndaı belgileri bar (koronavırýs) naýqastardy jiti qadaǵalaý kerektigin tapsyrdyq. Densaýlyq saqtaý departamenti naýqasty oqshaýlap, emdeýdi bastaýǵa daıyn», - dedi Kerala densaýlyq saqtaý mınıstri.
Reuters agenttiginiń málimetinshe, Úndistan úkimetindegi shendi sheneýnikterdiń biri úndistandyq azamattardy koronavırýstyń oshaǵy Ýhan qalasynan elge ákelý aýrý juqtyrý qaýpine baılanysty tıimdi jol emestigin aıtqan.
Osy aptada Úndistan Ýhanǵa ushý úshin ushaq ázirlegen, biraq Qytaı bıliginiń maquldaǵanyn kútken.
«Vırýsy joq azamattar ǵana evakýatsııalanady, olardy Delı syrtyndaǵy karantın ortalyǵyna jetkizedi», - dedi atyn ataǵysy kelmegen sheneýnik.
Budan buryn habarlanǵandaı, Dúnıejúzilik densaýlyq saqtaý uıymy (DDSU) 2019-nCoV koronavırýsynyń taralýyna baılanysty jahandyq tótenshe jaǵdaı jarııalaǵan bolatyn. Ótken táýlikte Qytaıda jańa koronavırýstan qaza tapqandar sany 43 adamdy qurady. 1982 adam aýrý juqtyrǵan.
