Úndistanda adam jegish jolbarystyń kesirinen mektepter jabyldy
ASTANA. 14 qańtar. QazAqparat - Úndistannyń ońtústik bóligindegi Tamılnad shtatynyń bıligi iri orman alqaby mańynda ornalasqan mektepterdi jaýyp tastady. Buǵan ótken aptada eki adamnyń ólimine kúdikti jolbarys sebep bolýda.
Atalǵan aýmaqta arnaıy operatsııa ótkizilýde, ıaǵnı osy sharaǵa jyrtqyshty toqtatý úshin arnaıy torlardy ustaǵan tártip saqshylary men pilder jumyldyrylyp otyr.
Jergilikti turǵyndar jolbarysty óltirý kerektigin talap etýde. Olardyń paıymynsha, jyrtqysh ań óńirge qaıta oralýy múmkin.
Úndistanda planetadaǵy jabaıy jolbarystardyń úshten eki bóligi ómir súrýde. Olardyń sany bul elde úsh myń eki júzge jýyq.
Jolbarystar osy eldiń zańymen qorǵalady, alaıda janýardyń meken etý ortasynyń azaıýyna baılanysty, jolbarystardyń adamdar ómir súretin jerlerge jıi shyǵa bastaǵany baıqalýda.
