Úndistanda 90-ǵa jýyq adam Zıka bezgegin juqtyrdy
NЬıÝ-DELI. QazAqparat - Úndistannyń Ýttar-Pradesh shtatynda 90-ǵa jýyq adam Zıka vırýsyn juqtyrǵan, dep habarlaıdy QazAqparat Economic Times-ke silteme jasap.
Jergilikti densaýlyq saqtaý departamentiniń deregine qaraǵanda, aýrýdyń kóp bóligi Kanpýr qalasynda tirkelgen.
Dúısenbidegi jaǵdaı boıynsha kem degende 89 adam, onyń ishinde 17 bala Zıka vırýsyna oń nátıje berdi, dep habarlady departament. Birinshi jaǵdaı 23 qazanda anyqtaldy, sodan beri dert juqtyrǵandar sany turaqty túrde ósip keledi.
Zıka – ásirese balalar, qart adamdar, sozylmaly aýrýǵa shaldyqqandar, sondaı-aq aıaǵy aýyr áıelder úshin qaýipti. Aýrýdy shybyn-shirkeı taratady. Úndistanda jańbyrly maýsym aıaqtalyp keledi, bul kezde bul jándikterdiń sany kúrt artady.
