Úndistanda 7 jasar qyzǵa 202 artyq tis shyqqan
ASTANA. QazAqparat - Úndistannyń Nıý-Delı qalasynda tosyn oqıǵa oryn aldy. 7 jastaǵy qyz tisiniń aýyrǵandyǵyn aıtyp, anasyna shaǵymdanady. Qyzynyń tisi isip ketkenin kórgen anasy ony dereý aýrýhanaǵa alyp barǵan.
Dárigerler qyzdyń aýyz qýysyn rentgenge túsirip, odontoma degen dıagnoz qoıady. Anasy dárigerden bul aýrý týraly egjeı-tegjeıli túsindirip berýin suraǵanda, dárigerler qyzdyń aýzyna 202 «artyq» tis óskendigin málimdedi. Sondaı-aq buǵan ózderi de tańdanyp otyrǵandaryn jasyrmady.
«Bundaı oqıǵamen biz birinshi ret kezdesip otyrmyz. Árıne, birneshe artyq tisi bolǵan emdelýshiler bolǵan, biraq 7 jastaǵy qyzdyń aýzynda 202 tis bolý degen - tańǵajaıyp oqıǵa. Endi biz ol tisterdi birtindep julýymyz qajet», - dedi dáriger-hırýrg Adjoı Roıchýdharı.
Hırýrgtardyń aıtýynsha, qyzdyń aýzynan 202 tisti qatarynan julý ońaıǵa túsken joq. Ota sátti ótip, qazir úndistandyq qyzdyń jaǵdaıy jaqsy, dep jazady sheteldik BAQ.
