Úndistanda 23 balanyń ýlanýyna sebepker bolǵan muǵalim tutqyndaldy
ASTANA. 28 shilde. QazAqparat - Úndistan polıtsııasy mektepte tegin tamaqtanyp júrgen 23 balanyń ýlanýyna sebepker bolǵan muǵalimdi tutqyndady. Oqıǵa jappaı tártipsizdikke alyp keldi: ádilettikti talap etken halyq polıtsııa qyzmetkerleriniń kólikterin órtedi, qala mańyndaǵy tas joldar men temir joldardy jaýyp tastady.
Esterińizge sala keteıik, ótken aptada Úndistannyń Bıhar shtatynda 23 bala tamaqtan ýlanyp, qaza tapqan bolatyn, olar mektep qabyrǵasynda tegin túski aspen tamaqtanyp júrgen. Sot-medıtsınalyq saraptaý nátıjesi boıynsha ýlanýǵa tamaq quramynan tabylǵan monokrotofos ınsektıtsıdi sebepker bolǵan. Bul toksındi zat tamaq qaldyqtarynan jáne as daıyndaǵan maıdan tabylǵan.
Balalardyń ólimine sebepker dep muǵalim Manodj Kýmar Chaýdharı (Manoj Kumar Chaudhary) aıyptalyp otyr. Polıtsııa ony Bıhar shtatyndaǵy Rohtas okrýginde qamaýǵa aldy.
Budan buryn polıtsııa qyzmetkerleri oqıǵa oryn alǵannan keıin jasyrynyp júrgen mektep dırektoryn tutqyndaǵan bolatyn. Ony izdestirý sharalary apta boıy júrgizilgen. Keıbir málimetterge qaraǵanda, aspaz tamaq daıyndaıtyn maıdan múńkigen ıisti sezgen, biraq mektep dırektory onyń tamaq daıarlaýyn jalǵastyrýyn talap etken. Jergilikti BAQ ókilderiniń jazýynsha, túski asqa qosylǵan maı sheneýniktiń kúıeýiniń dúkeninen satylyp alynǵan.
