Úndistanda 22 bala mektep tamaǵynan ýlanyp, qaza boldy
ASTANA. 18 shilde. QazAqparat - Úndistannyń Bıhar shtatynda 22 bala mektep tamaǵynan ýlanyp, qaza boldy, dep habarlaıdy Bı-Bı-Sı.
Aýrýhanaǵa 27 bala jetkizilgen, 22 bala ýlanyp, til tartpaı ketti. Shamamen áli otyzy aýrýhanada jatyr, keıbireýleriniń jaǵdaıy aýyr. Resmı málimetterge qaraǵanda, tamaqtyń quramynda ınsektıtsıd bolǵan.
8 ben 11 jas aralyǵyndaǵy oqýshylar seısenbi kúni túski asta Masrah qalasynyń mańyndaǵy Darmasatı eldi mekenindegi ózderi oqıtyn mektepte daıyndalǵan jasymyq pen kúrishti jegen. Aldyn ala jasalǵan taldaý boıynsha tamaqtyń ishinde fosfat bolǵan.
Ólim aýzynan aman qalǵan balalar aýdan ortalyǵy Chhapra aýrýhanasyna, sonymen birge shtattyń astanasy Patnaǵa jiberilgen. Keıbir balalar qazir óte aýyr jaǵdaıda.
Jergilikti bılik ókili Amarjıt Sınha jýrnalısterge bergen suhbatynda zııankesterdi joıýǵa arnalǵan fosfattyń jasymyqtyń ishinen shyqqanyn aıtqan. Alaıda bul ázirge aldyn ala boljamdar ǵana, máseleniń mán-jaıyn anyqtaý jumystary jalǵasyp jatyr.
«Naqty sebebi qorytyndy esepte belgili bolady», - dedi Sınha.
Ýlanǵan balalar mektepte «Mektep túski asy» degen baǵdarlama aıasynda tamaqtanyp júrgen. Bul baǵdarlama turmysy tómen otbasynan shyqqan 120 mıllıonǵa jýyq balany, jalpy Úndistan boıynsha 1,2 mıllıon mektepti qamtıdy.
