Úndistanda 13 adamdy jegen jolbarys óltirildi
ASTANA. QazAqparat - Úndistannyń Maharashtra shtatynda eki jyl boıy T-1 atty alty jasar jolbarysty aýlaı almaı kelgen. Ótken aıda bılik adamdarǵa qaýipti jyrtqysh ańdy Calvin Klein fırmasynyń erlerge arnalǵan ıissýynyń kómegimen ormannan qyzyqtyryp shyǵarmaqshy bolǵan, dep habarlaıdy BBC.
Bul jolbarys 13 adamnyń ómirin jalmaǵan. Belsendiler onyń ómirin saqtap qalý úshin naýqan júrgizdi, alaıda Úndistan Joǵarǵy soty bul jaǵdaıǵa aralasqan joq.
Úndistan orman sharýashylyǵy qyzmeti málim etkendeı, juma kúni keshkisin jergilikti turǵyndar jolbarysty baıqaǵandaryn habarlaǵannan keıin qarýly patrýl Boratı aýylyna bardy.
Janýardy tapqan reındjerler uıyqtatyn dárisi bar naıza atqan. Biraq, jolbarys olardyń kóligine shabýyl jasaǵan. Sol kezde patrýlderdiń biri 10 metr qashyqtyqtan myltyqpen atyp óltirdi.
Tamyzda jolbarys pen onyń on jastaǵy eki máýleni Pandharkavada qalasyna jaqyn jerde úsh adamdy óltirip, jergilikti turǵyndardy úreılendirgen.
Jolbarysty aýlaý úshin okrýgte júzdegen vıdeokamera ornatyldy, al aýyldarǵa tuzaq jem retinde jylqylar men eshkiler baılandy. Táýlik boıy patrýldeý uıymdastyryldy.
Bılik sharýalar men shopandarǵa orman men jazyq jerde qarańǵy túskende júrmeýge, adamdarǵa top-tobymen júrýge keńes berdi.
Bılik tipti jolbarysty quramynda tsıbetony bar Calvin Klein kompanııasynyń Obsession for Men ıissýy arqyly ustaýǵa talpyndy. AQSh-ta tsıbetonnyń ıagýarlardy tartatynyn kórsetken eksperıment júrgizilgen.
Guardian gazeti jazǵandaı, Úndistan bıligi Obsession átirsýyn kem degende eki jolbarysty ustaý úshin qoldanǵan.
«2015 jyly Tamılnad shtatynda adamdarǵa shabýyldaıtyn jolbarys paıda boldy. Men sol kezde ony ustaý úshin Obsession-ǵa tapsyrys berdim. Sondaı-aq, jolbarystyń nájisin de paıdalandym, biraq Obsession tıimdi boldy», - dedi gazetke jergilikti veterınarlyq qyzmettiń basshysy dáriger Praııag.
Onyń aıtýynsha, Chanel No 5 ıissýy da jaqsy jumys isteıdi.
«Biraq, ol qymbat, sondyqtan men CK Obsession átirin qoldandym», - dep túsindirdi dáriger Praııag.
Zertteý kórsetkendeı, mert bolǵan jeti adamnyń jaralarynda jolbarystyń silekeıi bolǵan. Qaza tapqan adamdardyń kóbiniń bastary julynǵan.
