Úndistan úkimetiniń basshysy BAÁ-ǵa 34 jyldan keıin alǵash ret resmı saparmen bardy
ÁBÝ-DABI. QazAqparat - Úndistan premer-mınıstri Narendra Modı Birikken Arab Ámirligine resmı saparmen bardy. Bul Úndistan úkimetiniń otyz tórt jyl ishindegi BAÁ-ǵa jasaǵan alǵashqy sapary, dep habarlady ámirliktiń WAM aqparattyq agenttigi.
N.Modı eki kúndik sapary aıasynda el astanasy Ábý Dabı men Dýbaıda bolady. Atalǵan ámirlikterdiń basshylarymen kelissózder barysynda ekijaqty saýda jáne lańkestikke qarsy kúres salasyndaǵy yntymaqtastyqty nyǵaıtý máselesi talqylanady. Sonymen qatar, taraptar BAÁ-nyń Úndistanǵa quıatyn ınvestıtsııa aıasyn keńeıtý joldaryn qarastyrady.
Úndistandyq premerdi Ábý-Dabı áýejaıynda ámirliktiń murager hanzadasy, BAÁ joǵary bas qolbasshysynyń orynbasary sheıh Mohammed bın Zaıed Ál Nahaııan jáne birqatar ózge de laýazymdy tulǵalar qarsy aldy. BAÁ-da 2,6 mln-ǵa jýyq úndistandyq turady. «Meniń BAÁ-ǵa kelgen saparymnyń nátıjesi ekijaqty qatynastardy yntalandyrady dep senemin», - dep jazdy N.Modı Tvıtter jelisindegi paraqshasynda. Úndistandyq premermen birge BAÁ-ǵa eldiń iri bıznesmenderi men saıası qaıratkerleri bardy.
