Úndistan turǵyny 14 týysyn óltirip, óz-ózine qol saldy
ASTANA. QazAqparat - 35 jastaǵy Úndistan turǵyny Hansıl Varekar óz januıasynyń 14 múshesin pyshaqtap, keıin óz-ózine qol saldy, dep habarlady jergilikti polıtsııa.
Qaıǵyly oqıǵa Mýmbaıdan soltústik-shyǵysqa qaraı 30 shaqyrym jerde ornalasqan Than qalasynda oryn aldy.
Polıtsııa aqparatynsha, senbi kúni keshke Varekar januıasynda merekelik jıyn bolǵan.
Úıdegi adamdar uıyqtaǵan kezde er adam esikti jaýyp, áıelin, segiz balasyn, úsh ápkesi men ata-anasyn pyshaqtap óltirdi. Keıin ózi asylyp qalǵan. Qylmyskerdiń bir ápkesi ǵana aman qaldy, onyń aıqaılaǵan daýysyn kórshisi estigen.
Esik jabyq bolǵandyqtan, kórshiler terezeni syndyryp kirgen. Polıtsııany shaqyrtyp, japa shegýshiniń úıden shyǵýyna kómektesti.
Jaraqattanǵan qyzdy jaqyn mańdaǵy aýrýhanaǵa jetkizdi. Ol qatty eseńgirep qalǵan.
Qylmys sebepteri ázirge belgisiz. Varekar merekelik sharalardy uıymdastyrýshy bolyp jumys istegen kórinedi.
