Úndistan tarıhyndaǵy eń iri parlamenttik saılaý bastaldy
NUR-SULTAN. QazAqparat - Úndistandaǵy parlamenttik saılaýǵa 900 mıllıonǵa jýyq adam qatysa alady. Saılaýdyń birinshi kezeńi búgin, beısenbide ótedi, dep habarlaıdy QazAqparat.
Buǵan deıin Úndistan saılaý komıssııasy málim etkendeı, aldaǵy daýys berý saılaýshylar sany boıynsha álem tarıhyndaǵy eń aýqymdy saılaý bolmaq. Saılaý barlyq 29 shtatta jáne jeti odaqtyq aýmaqta jeti kezeń boıynsha ótedi: 11 sáýir, 18 sáýir, 23 sáýir, 29 sáýir, 6 mamyr, 12 mamyr jáne 19 mamyr. Daýystardy sanaý 23 mamyrda aıaqtalýy tıis.
Beısenbi kúni 91 saılaý okrýginde jergilikti ýaqyt boıynsha 07:00-de saılaý ýchaskeleri ashylyp, 18:00-ge deıin jumys isteıdi.
Úndistan halqynyń shamamen 65%-ynyń jasy 35-ten tómen bolǵandyqtan, saılaýshylardyń quramyn tarıhtaǵy eń jasy dep dep te ataýǵa bolady. Sonymen qatar, bul álemdegi eń qymbat saılaý bolaıyn dep tur: The Times of India basylymynyń málimetine súıensek, saılaýǵa jumsalatyn jalpy shyǵyndardyń kólemi 7 mlrd dollardy quraıdy, demek orta eseppen ár saılaýshyǵa shaqqanda 8 dollardan.
1 mıllıonnan astam daýys berý ýchaskeleri ashylady. Parlamenttiń tómengi palatasyndaǵy 543 orynǵa shamamen 8 myń adam úmitker bolǵaly otyr. Kóp daýys jınaǵan partııa ǵana bıleýshi koalıtsııa qura alady jáne bul saıası uıym úkimetti jasaqtaıdy, al onyń kóshbasshysy premer-mınıstr bolady.
Foto: AP Photo/Anupam Nath
