Úndistan sportshylary Sochı olımpıadasynyń ashylýynda memlekettik týsyz sap túzep ótedi
ASTANA. 10 qańtar. QazAqparat - Úndistannyń olımpıadalyq qaýymdastyǵy tarabynan oryn alyp otyrǵan bıýrokratııalyq kedergilerdiń saldarynan osy eldiń sportshylary Sochı olımpıadasynyń ashylý saltanatynda ortaq olımpıadalyq tý astynda sap túzemek, dep habarlady The Time.
Basylymnyń aqparatyna qaraǵanda, úndistandyq sportshylar ózderiniń olımpıadalyq qaýymdastyqtarynyń beı-jaılyǵyna kúıip-túsip, terilerine syımaı júrgen kórinedi. Al daýdyń basy mynada, 2012 jyldyń jeltoqsan aıynda Úndistannyń olımpıadalyq qaýymdastyǵy jemqorlyq janjalǵa oraı basy pálege qalyp, sonyń saldarynan Halyqaralyq olımpıada komıteti bul eldiń músheligin ýaqytsha toqtatyp tastaǵan bolatyn. Sodan keıin Halyqaralyq olımpıada komıteti Úndistanǵa osy jyldyń 7 aqpanyna deıin jańa basshylyqqa daýys berýge keńes bergen-di. Alaıda, jaıbasarlyqqa salynǵan úndilikter daýys berý rásimin Sochı olımpıadasynyń ashylý rásimi ótkennen keıin, ıaǵnı 9 aqpanǵa belgilep otyr. Mine, sonyń saldarynan Úndistan sportshylary 4 jylda bir márte ótetin iri sporttyq dodanyń ashylý saltanatynda ortaq olımpıadalyq tý astynda sap túzep ótýge májbúr.
