Úndistan portynda Aýǵanstannan jetkizilgen 3 tonna geroın tárkilendi

NUR-SULTAN. QazAqparat – Úndistannyń Gýdjarat shtatyndaǵy portta júrgizilgen aýqymdy operatsııa aıasynda Kontrabandamen kúres jónindegi qyzmet shamamen 2,7 mlrd dollar somaǵa baǵalanǵan úsh tonnaǵa jýyq geroın tárkiledi, dep habarlaıdy QazAqparat BBC-ge silteme jasap.

Taýar talk retinde Aýǵanstannan Bender-Abbas ıran porty arqyly jetken.

Úndistannyń salyqty barlaý qyzmeti (DRI) elge kele jatqan júktiń ishinde esirtki bar ekeni týraly aqparat aldy.

Barlaý qyzmetiniń derekteri boıynsha, taýardy eldiń ońtústigindegi Vıdjaıavada qalasyndaǵy úndi kompanııasy ımporttaǵan.

Esirtkini zańsyz aınalymǵa engizý isi boıynsha eki adam ustaldy, taǵy birneshe adam tergelip jatyr. Olardyń qatarynda Aýǵanstan azamattary bar.

Qylmystyq saraptama aldaǵy ýaqytta tárkilengen esirtkiniń naqty qunyn anyqtaıdy. Tintý sharalary sonymen qatar Delı, Ahmadabad jáne Chennaı sııaqty qalalarda da ótti.