Úndistan men Reseı jibergen dári-dármek Qostanaıǵa jetti
QOSTANAI.QazAqparat – Elimizge Úndistan men Reseıden jetkizilip jatqan dári qorynyń qomaqty úlesi Tobyl óńirine de jetti. Osydan keıin aımaqta dárihana qoımalaryn qajetti dári-dármekke toltyrý máselesi de rettele bastady, dep habarlaıdy QazAqparat.
Úndistan men Reseıden kelgen dári-dármektiń ishinde 58 myń quty tseftrıakson, 36,5 myń tsefazolın, 20 myń qaptama atsetılın, 3 myń qaptama tamıflıý men teraflıý, sondaı-aq em alyp jatqan naýqastardyń qany uıyp qalmaý úshin qoldanylatyn 200 qaptama kleksan preparaty bar.
«Stofarm» seriktestiginiń kommertsııalyq dırektory Sergeı Atkınniń aıtýynsha, sheteldik dáriler bir táýliktiń ishinde oblystyń barlyq dárihanasyna taratylyp, saýdaǵa shyǵaryla bastady. Qazir vırýsqa qarsy «Groprınosın» dep atalatyn dáriniń 3,5 myń qaptamasy taratylýda.
Aıta keteıik, oblys ákimi Arhımed Muhambetov dárihana jelileriniń basshylarymen kezdesken . Kezdesý barysynda dárihanalarǵa 300 mln teńge bólinetin bolyp sheshildi. Bul qosymsha kómek vırýsqa qarsy qoldanylatyn preparattar, qannyń qoıýlanýyn tejeıtin antıbıotıkter satyp alý úshin berildi.
Densaýlyq saqtaý basqarmasynyń málimetinshe, taıaý kúnderi oblysqa Reseıden shyqqan dári-dármektiń jańa legi kelip jetýi tıis. Áleýmettik mańyzy bar bul dárilerdiń bári turmysy tómen otbasylarǵa taratylyp beriledi.
