Úndistan men Pákistandy ShYU rýhyn qatań ustanýǵa shaqyrý kerek - sarapshy

ASTANA. QazAqparat - Shynhaı yntymaqtastyq uıymynyń jaýapkershilik aýmaǵy keńeıdi. Bul týraly QazAqparat tilshisine suhbat bergen saıasattanýshy, Álemdik ekonomıka jáne saıasat ınstıtýtynyń sarapshysy Jumabek Sarabekov málim etti.

«Shanhaı yntymaqtastyq uıymyna múshe memleketter basshylary keńesi otyrysynyń tarıhı mańyzy bar. Atap aıtqanda, uıym tarıhynda múshe memleketter sany artyp otyr, ıaǵnı Astana sammıtinde ShYU-nyń keńeıý úderisiniń birinshi kezeńi júzege asyryldy. Sondyqtan búgingi oqıǵany óte mańyzdy sát dep senimdi túrde aıtýǵa bolady»,-dedi Sarabekov.

Búgingi tańda álem elderi lańkestik problemalaryna erekshe mán berip otyrǵanyna toqtalǵan sarapshy, osy oraıda Astanadaǵy sammıtte óńirlik jáne jahandyq janjaldardy sheshýde salmaqty máseleler talqylanyp otyrǵanyn atap ótti.

«Sońǵy kezderdegi oqıǵalar jelisin eskere otyryp, qazirgi tańda osy uıymǵa degen qajettilik artyp keledi. Úndistan men Pákistannyń resmı túrde ShYU-ǵa múshe bolýy, birinshiden, jaýapkershilik aýmaǵynyń keńeıgenin bildiredi. Buǵan deıin Shanhaı yntymaqtastyq uıymy negizinen Ortalyq Azııa óńirindegi jáne osy aýmaqqa shektes jerlerdegi máselelerge nazar aýdaryp kelse, búginde oǵan Ońtústik Azııa da qosylyp otyr. ShYU endi transaımaqtyq uıymǵa aınaldy»,-dep toqtaldy ınstıtýt sarapshysy.

«Úndistan men Pákistan ıadrolyq qarýy bar elderdiń qatarynda. Reseı men Qytaıdy qosyp eseptegende, endi ShYU quramynda tórt ıadrolyq derjava bolady. Bul uıymnyń salmaǵyna, yqpalyna áser etedi»,-deıdi ol.

Budan bólek Sarabekov Úndistan men Pákistan arasyndaǵy biraz rettelmegen máseleler bar ekenin, sondyqtan bul jerde ózara ekijaqty kıkiljińder ShYU mártebesine keri áserin tıgizbeýin qadaǵalaý kerektigin sóz etti.

«Bul turǵyda Qazaqstan tarapy óziniń áriptesterine Shanhaı yntymaqtastyq uıymy rýhyn ustanýǵa úndeý jasaýy kerek dep oılaımyn. Sebebi osy jyldary uıym aıasynda máselelerdi birigip qarastyryp, sheshim qabyldaýǵa qol jetkize aldyq. Osy oraıda burynǵy jáne jańadan qabyldanǵan mushelerdi Shanhaı rýhyn ary qaraı ustanýǵa shaqyrý kerek»,-dedi saıasattanýshy.

Onyń paıymynsha, uıym músheleri sanynyń artýy Ońtústik Azııa baǵytyndaǵy naryqtarǵa qoljetimdilikti arttyrýǵa septigin tıgizedi.
Budan buryn habarlanǵandaı, elordada ótken ShYU-ǵa múshe memleketter basshylary keńesiniń keńeıtilgen otyrysynda Úndistan men Pákistan resmı túrde ShYU-ǵa múshe boldy.