Úndistan men Pákistanda qýatty tsıklon qarsańynda 100 myńnan astam adam evakýatsııalandy
Bıpardja bengal tilinen aýdarǵanda «apat» degen maǵynany bildiredi. Sınoptıkterdiń boljamynsha Bıpradja Arab teńizinen ótip, beısenbi kúni keshkisin Úndistannyń Gýdjarat shtatyna jetedi. Tsıklon jergilikti turǵyndardyń úıleri men egistikterin joıýy múmkin.
Al, Pákistanda daýyl Sınd provıntsııasynyń jaǵalaýyna keledi. Bılik ońtústik-shyǵys jaǵalaýdan 62 myń adamdy evakýatsııalady jáne 75 lager qurdy.
Pákistan klımat ózgerisi mınıstri Sherrı Rehmannyń aıtýynsha, 20 mln adam turatyn provıntsııanyń iri qalasy Karachıge qaýip tónip tur, biraq shuǵyl sharalar qabyldanyp jatyr.
Meteorologterdiń aıtýynsha, bul qýatty daýyldyń jyldamdyǵy saǵatyna 135 shaqyrymǵa deıin jáne ekpini 150 shaqyrymǵa deıin jetedi. Sondaı-aq, olar tolqynnyń kóterilýinen jaǵalaýdaǵy aýdandardy sý basýy múmkin ekenin eskertti.
Bılik Gýdjarat aýdanynda poıyz qozǵalysy toqtaǵanyn málimdedi, al Úndistannyń eki iri Kandla jáne Mýndra porttary jumysyn toqtatty.
Keıingi jyldary klımattyń ózgerýine baılanysty Arab teńiziniń betki temperatýrasynyń joǵarylaýy qorshaǵan aımaqtardy joıqyn daýyldarǵa odan da osal etti. Aıta ketsek, Taýktae tsıklony – 2021 jyldyń mamyrynda osy óńirge kelgen sońǵy kúshti tsıklon. Ol kezde 174 adam qaza tapqan bolatyn.
