Úndistan men Pákistan ShYU-ǵa Astanadaǵy sammıtte qabyldanady
Bul týraly búgin Shanhaı yntymaqtastyq uıymyna múshe memleketter Syrtqy ister mınıstrleriniń kezekti otyrysynda QR Syrtqy ister mınıstri Qaırat Ábdirahmanov málim etti, dep habarlaıdy QazAqparat.
«Búgingi bizdiń otyrysymyz aldaǵy ShYU sammıtine daıyndyqtyń negizgi kezeńi sanalady. Qazaqstan taraby tolyqtaı alǵanda Astana sammıti qorytyndysy boıynsha qol qoıýǵa usynylyp otyrǵan negizgi qujattardy jáne olardyń tizimi jobasyn qoldaıdy. ShYU-ny keńeıtý máselesi búgingi kúni barynsha ózekti bolyp otyrǵandyǵy sózsiz. 2005 jyldyń shilde aıynda Astanada ótken ShYU-ǵa múshe memleketter basshylarynyń otyrysynda Úndistan men Pákistan baıqaýshy memleket mártebesin alǵan bolatyn. Al aldaǵy ShYU sammıtinde bul kezeńde uıymymyzdy keńeıtý protsesiniń aıaqtalýyna kýá bolamyz. Úndistan men Pákistandy tolyqqandy múshe retinde qabyldaý protsedýrasynyń aıaqtalýy týraly sheshimge qol qoıý damýdyń jáne kópbeıindi yntymaqtastyqtyń múldem jańa kezeńin ashady. ShYU keńistigindegi jan-jaqty ózara is-qımyldyń jańa kókjıekterin aıqyndaýǵa múmkindik berip, uıymnyń halyqaralyq yqpaly men bedelin nyǵaıtady. Biz Irannyń ShYU-ǵa tolyqqandy múshe bolýy týraly máseleni oń qarastyrýǵa daıyn ekendigimizdi bildiremiz. Taıaý bolashaqta múshe memleketter Irannyń jáne ShYU-daǵy ózge de seriktesterimizdi tolyqqandy múshelikke ótý, baıqaýshy el mártebesin alý ótinimderin oń qaraıdy dep úmit artamyz», - dedi Ábdirahmanov.
Sonymen qatar ol Qazaqstan ShYU-nyń basqa da halyqaralyq jáne óńirlik uıymdarmen, qurylymdarmen ózara is-qımyly máselesinde ShYU-nyń EAEO, Qyzyl krest halyqaralyq komıteti jáne Islam yntymaqtastyq uıymymen tyǵyz ózara is-qımyldy jolǵa qoıýyn quptaıtyndyǵyn basa aıtty. Vedomstvo basshysy ShYU-ǵa múshe memleketterdiń belsendi qoldaýymen 2017-2018 jyldary kezeńinde BUU Qaýipsizdik Keńesiniń turaqty emes múshesi retinde jumysyna kiriskendigin atap ótti.
Munan bólek Qazaqstan Syrtqy ister mınıstri uıymdaǵy barlyq seriktesterge Qazaqstannyń ShYU-ǵa tóraǵalyǵyn jan-jaqty qoldaý bildirgenderi úshin rızashylyǵyn bildirdi.
«Búgingi otyrystyń qorytyndysynda Astanada maýsym aıynda ótetin ShYU sammıtin barynsha mazmundy tolyqtyrýdy qamtamasyz etýge baǵyttalǵan ýaǵdalastyqqa qol jetkizetindigimizge senimdimin. Biz ShYU-ǵa múshe memleketter basshylary keńesi barysynda qol qoıýǵa usynylatyn qujattar men kún tárbiniń jobasyn qarap bekitý jáne maquldaý, sonymen qatar uıymymyzdyń qyzmeti máseleleriniń keń spektrine jáne uıymdastyrýshylyq-kadrlyq aspektilerine qatysty sheshimdi bekitýimiz qajet. Halyqaralyq, óńirlik ózekti máseleler, ShYU-ny odan ary damytý perspektıvalary, uıymnyń ózge de kópjaqty birlestiktermen baılanysyn ornatyp, bekitý boıynsha pikir almasýdy usynamyn», - dedi ol.