Úndistan men Pákistan baǵytynda tasymaldaý áleýetin damytýǵa basymdyq beriledi - mınıstr

ASTANA. QazAqparat – Saýda jáne ıntegratsııa mınıstrliginiń keńeıtilgen alqa otyrysynda vedomstvo basshysy Serik Jumanǵarın Úndistan men Pákistan baǵytynda tasymaldaý áleýetin damytýǵa basymdyq beriletinin aıtty, dep habarlaıdy «QazAqparat» tilshisi.

«Búgingi tańda Transkaspıı halyqaralyq kólik baǵytyn damytý sheńberinde «Soltústik-Ońtústik» shyǵys tarmaǵynyń ınfraqurylymyn Iranǵa qaraı damytýǵa erekshe kóńil bólinip otyr. Negizgi basymdyq – Úndistan men Pákistan baǵytynda tasymaldaý áleýetin damytý. Sondaı-aq, Qytaı, Reseı jáne Qyrǵyzstanmen shekaralardaǵy ortalyqtardy jańǵyrtý jumystary jalǵasady. Jobany sátti iske asyrý tranzıttik júk aǵynyn 2 ese, al taýar aınalymyn orta eseppen 30%-ǵa ulǵaıtýǵa múmkindik beredi», - dedi mınıstr.

Qosa ketsek, buǵan deıin Serik Jumanǵarın Qazaqstan men Ózbekstan arasyndaǵy shekarada «Ortalyq Azııa» halyqaralyq ónerkásiptik kooperatsııa ortalyǵy qurylatynyn málimdegen edi.