Úndistan men Qytaı elderi alǵash ret birigip kıno túsirmek
ASTANA. QazAqparat - Jekpe-jek sheberi, tanymal akter Djekı Chan Úndistan men Qytaıdyń birinshi birlesken fılmine túsedi, dep habarlady TASS.
Eki eldiń kınematograftary úshin bul - úlken oqıǵa. «Kýng-fý ıoga» degen ataýdaǵy fılmnyń túsirilýi Beıjiń men Delı arasyndaǵy baılanysty jaqsarta túsedi.
Úndistan gazetteri kınematografısterdiń birinshi birlesken jumysyna qyrkúıek aıynda QHR tóraǵasy Sı Tszynpınniń Nıý-Delıge kelýi sebep boldy dep jazýda. Osy sapardyń barysynda túsirilimniń bastalýyn qarastyratyn resmı qujatqa qol qoıyldy.
Ázirge Djekı Channan basqa fılmge kimniń túsetini belgisiz. Akterlerdi 2005 jyly túsirilgen «Mıf» lentasy arqyly tanylǵan qytaı rejısseri Stenlı Tong tańdaıdy.
