Úndistan Qazaqstanda aqparattyq tehnologııalar ýnıversıtetin ashpaq

NUR-SULTAN. QazAqparat – Úndistandyqtar Qazaqstanda qos dıplom baǵdarlamasymen oqytatyn aqparattyq tehnologııalar ýnıversıtetin ashýdy usyndy. Bul týraly Ǵylym jáne joǵary bilim mınıstrliginiń baspasóz qyzmeti málim etti, dep habarlaıdy QazAqparat tilshisi.

Ǵylym jáne joǵary bilim mınıstri Saıasat Nurbek Úndistannyń halyqaralyq medıtsına jáne ǵylym akademııasynyń bas dırektory Nadjhavan Rýpalmen kezdesti. Onda oqý ornynyń basshysy elimizde aqparattyq tehnologııalar ýnıversıtetin jáne Úndistannyń halyqaralyq medıtsına jáne ǵylym akademııasynyń bólimshesin ashýdy usyndy. Buǵan qosa, Nadjhavan Rýpal Qazaqstanda emhana men farmatsevtıkalyq zaýyttar salýǵa nıetti ekenin jetkizdi.

Eske salaıyq, buǵan deıin Ǵylym jáne joǵary bilim mınıstri Saıasat Nurbek elimizdegi 2 joǵary oqý ornyna zertteý ýnıversıteti mártebesi beriletinin málimdegen edi.