Úndistan Qazaqstan jibergen gýmanıtarlyq kómekti joǵary baǵalady

NUR-SULTAN. QazAqparat - Úndistan osy elde jaqynda koronavırýstyń órshýine qarsy turý úshin dostas Qazaqstan jibergen gýmanıtarlyq kómekti joǵary baǵalady, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Osyǵan baılanysty, birqatar úndi kompanııalarynyń basshylyǵy Qazaqstannyń Nıý-Delıdegi Elshiligine óz hattaryn joldap, búkil álem úshin osyndaı qıyn ýaqytta yntymaqtastyq pen qoldaý kórsetkeni úshin shynaıy rızashylyǵyn bildirdi.

«2021 jylǵy 13 jáne 14 mamyrda Qazaqstannan jetkizilgen medıtsınalyq kómek kóptegen adamdardyń ómirin saqtap qalýǵa kómektesetini sózsiz. Úndister bul asyl ısharatty árqashan este saqtaıdy» dep kórsetilgen hatta.

Budan buryn habarlanǵandaı, Nıý-Delı áýejaıyna jalpy salmaǵy 40 tonnaǵa jýyq gýmanıtarlyq kómek júgi bar eki qazaqstandyq áýe kemesi keldi. Onda densaýlyq saqtaý salasyndaǵy qazaqstandyq óndirýshi kompanııalardyń medıtsınalyq maska, respırator, qorǵanys kostıými jáne ókpeni jasandy jeldetýdiń portatıvti apparattary bar.

Esterińizge sala keteıik, 2021 jylǵy 4 mamyrda Qazaqstan Prezıdenti Qasym-Jomart Toqaev Úndistan Premer-Mınıstri Narendra Modıge joldaý jibergen, onda «Úndistanda COVID-19 indetiniń qatty órshýine baılanysty qalyptasqan qıyn-qystaý kezeńde úndi eliniń qaıǵy-qasiretine ortaq ekenin jetkizgen» bolatyn.

Al 7 mamyrda Qazaqstan Úkimetine úndi tarapyna tıisti kómek kórsetýdi tapsyrdy.

Qazaqstan men Úndistandy eki el halyqtary arasyndaǵy dástúrli dostyq pen ózara janashyrlyq rýhynda strategııalyq áriptestik qatynastar biriktiretinin atap ótken jón.