Úndistan azamaty «Eır Astana» ushaǵynda shý shyǵardy

NUR-SULTAN. QazAqparat – Kólik polıtseıleri ákimshilik quqyq buzýshylyq jasaǵany úshin Úndistan azamatyn «Almaty-Shymkent» áýe reısinen túsirip aldy, dep habarlaıdy QazAqparat tilshisi.

Kóliktegi polıtsııa departamentiniń málimetinshe, Almaty qalasynyń áýejaıyndaǵy polıtsııa jelilik bólimine «Eır Astana» áýe kompanııasynyń ókili habarlasyp, «Almaty-Shymkent» baǵytynda qatynaıtyn ushaq bortynda quqyq buzýshy bar ekenin aıtqan. Kólik polıtseıleri tekserý barysynda 43 jastaǵy Úndistan azamatyna anyqtaǵan. Mas úndistandyq ózin dóreki ustap, ushaq jolaýshylarynyń mazasyn alǵan.

«Destrýktıvti jolaýshy mán-jaıdy anyqtaý úshin atalǵan áýe reısinen akti toltyrý arqyly túsirildi. Medıtsınalyq kýálandyrý qorytyndysyna sáıkes, ol «ortasha deńgeıde» mas bolǵan. Onyń ústinen QR ÁQBtK 440-baby 1-tarmaǵymen ákimshilik hattama toltyryldy jáne 12 625 teńge ákimshilik aıyppul salyndy», - delingen taratylǵan aqparatta.
Esterińizge sala ketsek, osy jyldyń basynan beri elimizdiń kólik polıtseıleri 28 590 azamatty ákimshilik jaýapkershilikke tartty. Onyń ishinde 4 669 adam qoǵamdyq orynda alkogol sýsynyn ishkeni nemese qoǵamdyq orynǵa mas kúıinde kelgeni úshin jazalandy.