Úndistan azamattaryna vızasyz rejim berilýi múmkin - Úkimet

ASTANA. QazAqparat - Úkimet basshysy Baqytjan Saǵyntaev Úndistan azamattary úshin 72 saǵattyq vızasyz rejimdi engizý máselesin pysyqtaýdy tapsyrdy, dep xabarlaıdy QazAqparat tilshisi.

«Negizi, sońǵy jyldary áýejaılardyń ınfraqurylymy xalyqaralyq talaptarǵa saı jasaqtaldy. Birneshe qala qaldy. 2020 jylǵa deıin osy jumysty aıaqtaý qajet. Aqsha bar. Endi, júktelgen mindetterdi der kezinde oryndaý qajet», - dep atap kórsetti B.Saǵyntaev.

Osy oraıda Úkimet basshysy jolaýshylary tasymalynyń artyp jatqanyn erekshe atap ótti. «Tórt jyl buryn bizde jolaýshylar tranzıti nóldik deńgeıde bolǵan. Qazirgi kezde biz 800 myń adamnyń mejesine shyǵyp otyrmyz. Osy oraıda Úndistan azamattary úshin 72 saǵattyq vızasyz rejimdi engizý máselesin pysyqtaýymyz qajet. Osy eldiń xalqy mıllıardtan asatynyn eskersek, óz jerimiz arqyly ótetin jolaýshylardyń kólemin aıtarlyqtaı ulǵaıtýǵa bolady dep oılaımyn. Osy máseleni sheshsek, 800 myń jolaýshylar tranzıtin 1 mıllıonnan asyra alamyz», - dep atap kórsetti B.Saǵyntaev.