Úndistan aǵylshyn tilinen bas tartady
ASTANA. QazAqparat - Úndistannyń premer-mınıstri Narendra Modı jańa zań jobasyn shyǵardy, oǵan sáıkes endi sheneýnikter hındı tilinde ǵana sóılesýi tıis, dep jazady Rossııskaıa gazeta.
Premer memlekettik qyzmetkerler men barlyq mınıstrlikterdiń jáne vedomstvolardyń sheneýnikteri, korporatsııalar men bankter Twitter, Facebook, Google, YouTube sııaqty áleýmettik jeliler men blogtardy paıdalanýda ata-baba tiline basymdyq berýi tıis ekendigi týraly ókim shyǵardy. Osy jarlyqtan keıin mınıstrlik basshysy jańa jobasyn jarııalady. Onda hındı tilinde sóılesetin memlekettik qyzmetkerlerge qosymsha 2000 rýpıı mólsherinde (bul kúnine 33 dollarǵa jýyq) syıaqy berý kózdelgen.
Mundaı qadam Úndistannyń saıası ortasynda úlken dúrbeleń týǵyzdy. Óıtkeni, el azamattary 100-den astam tilde sóıleıdi. Al hındı tilinde halyqtyń 40 paıyzǵa jýyǵy ǵana sóılesedi. Ásirese bul tilde Úndistan halyqtyq partııasynyń ókilderi belsendi sóılesedi, bul partııa osy jylǵy mamyr aıynda Úndistan parlamentindegi kópshilik orynǵa ıe boldy.
Úndistan úkimeti keıinirek bul zań hındı tili keń taralǵan Úndistannyń soltústik aımaqtaryna qatysty ekenin túsindirdi. Degenmen premerdiń saıası opponentteri oǵan qarsylyq bildirýde.
Modı sheteldik basshylarmen kezdesýde hındı tilinde sóılep, aýdarmashyny paıdalanǵanymen Úndistan elıtasynyń basym bóligi sııaqty ol da aǵylshyn tilinde óziniń oıyn jetkize alady. Deıturǵanmen kópshilik hındı tiliniń halyqaralyq tildi yǵystyra alatynyna kúmán keltiredi.
