Úndistan 15 qazannan bastap sheteldik týrısterdi qabyldaı bastamaq

NUR-SULTAN. QazAqparat – Úndistan 15 qazannan bastap halyqaralyq týrısterdi qabyldaı bastamaq. Bul týraly Úndistannyń týrızm mınıstri Shrıpad Naık aıtty, dep habarlaıdy QazAqparat India.com saıtyna silteme jasap.

«Vırýstyń taralý qarqynynyń tómendeýine baılanysty biz ishki jáne sheteldik týrızm úshin shekaramyzdy ashamyz. Buǵan qatysty 15 qazannan keıin tolyq aqparat beretin bolamyz.Elde qazirgi kezde halyqaralyq reıster ushyp jatyr. Biz belgili bir kúnge charterlik reısterdi uıymdastyrý týraly usynys jasadyq. Osylaısha, adamdar aldyn ala Úndistanǵa saparlaryn josparlaı alady», - dedi Shrıpad Naık tilshilerge.

Aıta ketsek, týrısterdiń kóbi Úndistannyń ońtústik-batysyndaǵy Goa shtatyna keledi.