Úndilik «Kelin» telehıkaıasynyń basty keıipkeri Anandı Astanaǵa keledi
ASTANA. QazAqparat - Úndi eliniń tanymal aktrısasy Avıka Gor «Qazaqstan» Ulttyq telearnasynyń birneshe baǵdarlamasyna qatyspaq, dep jazady «Qazaqstan» RTRK saıtynda.
Kórermenniń kózaıymyna aınalǵan «Kelin» serıalynyń basty keıipkeri - Anandıdiń jas kezindegi rólin somdaǵan Avıka Gor «Qazaqstan» Ulttyq telearnasynyń birneshe habaryna qatysý úshin anasymen birge Astanaǵa keledi.
Avıka Gor - kórermeni kóp «Kelin» telehıkaıasyna túskende nebári 5-synypta oqyǵan. Jas kelin Anandı - onyń alǵashqy róli.
«Kishkentaı bolǵan soń, kınoǵa túsý oıyn sııaqty kórinetin. Keıde túsirilim alańynan baǵaly kıimderimmen qashyp ketetinmin. Árıne, jazasyn da alatynmyn», - deıdi bir suhbatynda ol.
Avıka «Kelin» telehıkaıasyndaǵy osy róli úshin kórermenderiniń alǵysyna bólenip, kóptegen syılyqtarǵa ıe bolǵan. 2009 jyly ol Ulttyq Radjıv Gandı atyndaǵy syılyqpen marapattalǵan.
Buqaralyq aqparat quraldarynyń birine bergen suhbatynda Avıka bolashaqta ataqty aktrısa jáne álem arýy bolǵysy keletinin aıtady. Kınodaǵy róli týraly kishi Anandı 3 naýryz, dúısenbi kúni Ulttyq telearnanyń «Tańsholpan» baǵdarlamasynda oı bólisedi.
